Минем быелгы язым башкаларына бер дә охшамаган!

Күңелемдә йөрткән хыялым — татар кызлары өчен файдалы һәм матур контент булдыру хыялым тормышка ашып килә.

Әлеге сәхифәдә сез минем белән бергә табигатьнең матурлыгына да соклана алырсыз, дөнья мәшәкатьләрен  читкә куеп торып, бераз ял да итеп алырсыз.

Матурлык иленә сәяхәт вакытында сезнең ял сәгатьләрегез бераз ямьләнә икән, димәк, мин максатыма ирештем дигән сүз.

Биредә тупланган язмалар һәм башка материаллар тормыштагы максатларыгызга ирешү өчен тырышкан вакытта сезгә көч тупларга ярдәм итә икән, мин икеләтә бәхетле!

Тормышыбызны якты, матур уйлар, изге ниятләр белән уздырыйк. Киләчәгегез сөенечле вакыйгаларга, игелекле гамәлләргә бай булсын.

Барлык хыялларыгыз да тормышка ашсын!

Юлыгызда һәрвакыт яхшы кешеләр генә очрасын.

Язларыгыз якты булсын.                                                                                                                                                                         апрель, 2021

Наилә Гаффарова.

Кыскача үзем турында:

* Табигатьне, матурлыкны, гаиләмне, туган телебезне яратам,  милли гореф-гадәтләребезне хөрмәт итәм.

* Соңгы берничә  ел минем өчен ачышлар елы булды.

* Тыйнаклыгымны җиңеп, язасы килгән фикерләремне ачыктан-ачык җиткерергә өйрәнә башладым. Ә язасы килгән фикерләр бик күп!

* Юлларда очраган авырлыклар алдында югалып калмаска һәм кирәк вакытта үз-үзеңә көч бирә белергә кирәк икәнен аңладым.

* 2019-нчы ел башында #әдәбимарафон проектына кушылып киткәч, русча китаплар белән беррәттән, татарча китаплар да күп укый башладым. Татарча китаплар укуны бик сагынганымны аңладым.

* Тормыш юлларыннан атлаганда читкә тайпылмыйча, бары үз юлыңнан барганда гына бәхетле яшәп булганына төшендем.

* Һәр эштә дә Аллаһы тәгаләнең ярдәмен сорарга, булган һәр әйбер өчен рәхмәт әйтеп яшәргә кирәклеген тагын да тирәнрәк аңладым. Ә рәхмәт әйтеп яшәү өчен сәбәпләр һәрберебезнең тормышында да бик күп!

* Һәр кешенең дә матур, бик талантлы һәм уникаль икәненә игътибар итә, тирә-ягымдагы кешеләрне үзем өчен яңа яктан ача башладым.

~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~

Иҗатым: https://yaktiyaz.ru/category/izhatym/

Иҗатымны чагылдырган китап бастыру, сайт ясау – кайчандыр хыялымда гына иде. “Иҗат җимешләрем зәвыклы һәм матур булсын, җиңеллек һәм рәхәтлек бирә алырлык булсыннар иде!” – диеп хыялландым. Тик әлеге эшне ахырына кадәр башкарып чыгу өчен минем идеяләрне аңлаучы кешеләр кирәк иде.

Аллаһы Тәгаләнең ярдәме белән, юлымда табигатьне, матурлыкны яратучы, әйтергә теләгән фикерләремне ярты сүздән аңлаучы, әлеге фикерләргә бик сак караучы кешеләр – тел белгечләре, сәләтле дизайнер кызлар, сайт ясау серләрен белүче егетләр очрады. Ярты сүздән аңлап, минем күзаллауны кабул итеп тикшерделәр, бизәделәр, ясадылар алар сайтны да, китапны да.

Бик зур рәхмәт аларга!  Тыйнак, акыллы һәм зирәк тә инде безнең татар кызлары һәм егетләре! Хыялларны тормышка ашырырга җыенган вакытта юлыңда кирәкле кешеләр очравы зур бәхет икән ул!

Ps.: Ул чорда аралашкан, җылы сүзе, киңәше белән ярдәм иткән кешеләр бик күп иде, шуңа да исемнәрне атап язып тормадым! Берәр кешенең исеме төшеп калса, күңелләре калыр кебек.)

“Нурлы хәятем” китабын сатып алырга: https://vk.com/market/product/kniga-kitap-quotnurly-kh1241yatemquot-212815526-10103875

P.S. Сайтта урнаштырылган материалларны кулланган очракта, авторны күрсәтү һәм сайтка сылтама кую мәҗбүри.